Joan den uztailaren 12an HAPOren Aurrerapena aurkeztu ondoren, eta legeak eskatzen duen gutxieneko denboran jendaurrean egon arren, hau da bi hilabetez, abuztuarekin barne, bere momentuan EAJ-PNVtik salatu genuen bezala, eta beste hilabete batez luzatzeko eskatuz, lan egin dugu ‘Durango Helburu’ taldearekin batera, Hiri Antolamendurako Plan Orokorra hobetzeko ekarpenak aurkezteko. Udalerri batentzat berebiziko garrantzia duen dokumentua da, eta dagoen Aurrerapen-dokumentuak ez die etorkizuneko Durangoren beharrei erantzuten.

EAJ-PNVn uste dugu HAPOren dokumentua kontzienteki eta ahalik eta parte-hartze handienarekin landu behar dela, eta hori ez da gertatu Aurrerapenaren hasierako fase honetan, beharrezko parte-hartzerik gabe eta ekarpenak egiteko denbora gutxirekin egindako dokumentua baita. Izan ere, dokumentuaren idazketari buruzko informazioa Lurralde Batzordean behin eta berriz eskatu arren, Batzorde horretan ez da azalpen bakar bat ere eman, ez da ezertaz informatu, ez da planorik erakutsi, eta ez da azaldu zein diren helburuak eta zer irizpide lortu nahi diren.

“Durango Helburun egindako kontrastetik ondorioztatzen dugu, besteak beste, presaka egindako dokumentua dela, behar bezalako parte-hartzerik gabe eta etorkizuneko Durango diseinatzeko alderdi garrantzitsuei behar besteko arretarik eman gabe. Horrela, kezkaz ikusten dugu osasun, hezkuntza edo jarduera ekonomikoen arloko aukera garrantzitsu batzuk arriskuan daudela, besteak beste”, Mireia Elkoroiribe EAJ-PNV udal taldeko bozeramaileak azaldu duenez.

Hala, Durangoko EAJ-PNVk 10 ekarpen aurkeztu ditu guztira, udalerriaren garapenerako hain garrantzitsuak diren alderdiak zehaztuz eta osatuz, hala nola bizitegien eta industriaren hazkunde-eredua; komunikazioak, hala nola trafiko-fluxuak, bidegorriak eta garraio publikoa; kultura-, kirol-, hezkuntza-, laguntza- eta osasun-ekipamenduak, bereizmen handiko osasun-zentroa barne. Ekarpen horiek turismoa eta merkataritza bultzatzearen edo berdeguneak eta sare berdea garatzearen garrantzia azpimarratzen dute. Era berean, Trenbidearen Barne Eraldaketarako Plan Bereziaren atal espezifiko bat ere badu, aurreikusitako ekipamendu-espazioa mantentzearen garrantzia azpimarratzen duena, gobernu-taldearen planteamenduaren arabera behin betiko desagertuko litzatekeena. “Gure ustez, funtsezkoa da ekipamendu-gune hori mantentzea eta durangarren beharrei erantzungo dieten udalez gaindiko zerbitzuak ezartzearen eta Durangoko eskualdeburu izatearen aldeko apustua egiten jarraitzea. Kontrakoa akats larria litzateke, eta etorkizunean damutu egin gaitezke”.

Laburbilduz, Durangoko EAJ-PNVk eta Durango Helburu lantaldeak ekarpenak egin dituzte Durangorako beharrezkoa den udalerri-eredua diseinatzeko; izan ere, Elkoroiribek adierazten duen bezala, “EAJ-PNVren iritziz, hirigintza-plangintza oso tresna garrantzitsua da pertsonen bizi-kalitatea hobetzen dela bermatzeko, eta, beraz, plangintza-gaiei buruzko erabakiak hartzera bideratutako jarduera orotan, interes publikoa gailendu behar da beste edozeinen aurrean. Hala ere, badirudi aurkeztutako HAPOren Aurrerapenaren dokumentua presaka egin dela, legegintzaldi honetan gobernu-taldearen erabaki politikoa baliozkotzeko helburu bakarrarekin, trenbidearen Barne Eraldaketarako Plan Bereziaren eraikigarritasuna murrizteko, eta, horrela, ezinezkoa dela espazio horretarako beste edozein diseinu egitea”.

EAJ-PNVtik espero dugu Durangoko Udaleko talde tekniko eta politikoak proposamen horiek aztertu eta aintzat hartzea. Proposamen horiek hainbat pertsona-talderen parte-hartzearekin egin dira, guztiontzako Durango hobea planifikatzeko, izaera traktore eta dinamikoarekin, egungo eta etorkizuneko beharrei erantzuteko.

EKARPENEN DOKUMENTUA