Berri ona da Urki Hegoaldeko bidearen laugarren eta azken fasea eraikitzeko lizitazioa; izan ere, Durangoko EAJ-PNVk Eguzkitzako industria-lurzoruaren garapenaren aldeko apustua egin du beti.

Nolanahi ere, gogoratu behar dugu gobernu-taldearen meritu bakarra 2010ean EAJ-PNVren agindupean hasitako proiektu bati jarraipena ematea dela. Proiektu hori faseka gauzatzen ari da, proiektu handia delako eta kostu handia duelako. Hala, bigarren fasea 2014an amaitu zen, eta 2018an hirugarrena esleitu zen. Legegintzaldi honetan, oposiziotik eskatu dugu bultzada hori. Orain, legegintzaldia agortzear dagoela, laugarren fasea lizitatuko da, Eguzkitzako industria-sektorea bultzatzeko eta Durangoko erdigunetik igarotzen den trafikoa desbideratzeko. “Albiste ona da, nahiz eta bitxia izan lizitazioa gaur egungo gobernu taldearen garaipena balitz bezala iragartzea, hauteskunde aurreko garaian, proiektu luze eta garestia denean, eta proiektu gehiena eginda dagoenean, eta azken lau urteetan oso gutxi aurreratu da”, Mireia Elkoroiribe EAJ-PNVko alkategaiak azaldu duenez.

EAJ-PNVk Urki-Hegoalde bidearen amaierarekin eta Eguzkitzako lur industrialen garapenarekin aurrera egiteko beharra azpimarratu du. Izan ere, udal talde jeltzaleak ekarpenak aurkeztu zizkion HAPNren Aurrerapen dokumentuari, Eguzkitza II eta Eguzkitza III industria-eremuen eraikigarritasunari eusteko, eta gobernu-taldeak egindako planteamenduetako batek hura murriztea proposatzen zuen. “Eguzkitzaren garapena modu irmoan bultzatzeko garaia dela uste dugu EAJ-PNVtik. DEK-Durangaldea Enpresa Ekimena sustapen ekonomikorako erakunde berria sortzea, eskualdean goi-mailako prestakuntza bultzatzea eta Durangon industria-lurzoru berriak garatzea aukera paregabea da oinarri teknologikoko enpresa berriak dibertsifikatzeko eta sortzeko, eskualdeen lehentasun estrategikoekin lerrokatuta, eta horrek kalitatezko enplegu-aukera handiagoak ekarriko ditu”, Elkoroiribek azaldu duenez.