Duela astebete eskas, EAJ-PNVk Plateruenako kudeaketa-eredua zehazteko beharra azpimarratu zuen, udal taldearen mozio bati esker osoko bilkuran eztabaidatu ondoren, eta erantzuna, beste behin ere, prentsan dago, Astarloa Kulturgintzako Batzordean galdetu arren. “Beste behin ere, gobernu-taldeak alde bakarrez hartutako erabaki batekin topo egin dugu. Bertan, Plateruenako kudeaketa-ereduari buruz galdetu dugu berariaz, eta behin eta berriz eskatu dugu iraileko osoko bilkuran gure mozioa eztabaidatu ondoren hartuko diren erabakien berri emateko, baina gobernu-talde honek harritu egiten gaitu haren gardentasun eta informazio faltarekin”, Mikel Ortega EAJ-PNVko zinegotziak deitoratu duenez.

Joan den irailean, EAJ-PNV Udal Taldeak mozio bat sartu zuen osoko bilkuraren eztabaidan, eta mozio horren bidez gobernu taldeari eskatu zitzaion duela urte eta erdi Plateruenako proiektua definitzeko eta instalazioa lehenbailehen irekitzeko hasitako prozesua amaitzeko. “Udalbatza osoak mozio horren aldeko botoa eman zuen, baina gaur arte, prentsan irakurri ahal izan dugunez, ez dugu gobernu-taldearen asmoen berri izan. Azaroaren 15ean egindako Astarloa Kulturgintzako Batzarrean txosten tekniko bat aurkeztu zitzaigun, Plateruena kudeatzeko aukerak azaltzen zituena. Gobernu taldearen jarrera zein zen galdetu genuen, eta Ane Abanzabalegi Astarloa Kulturgintzako lehendakariak erantzun zuen ez zegoela batere zehaztuta, aztertzen ari zirela. Lehenbailehen irekitzea zen asmoa”, azaldu du Ortegak.

EAJ-PNVk lankidetza publiko-pribatuko eredu baten aldeko apustua egin du beti, “Durangoko eta Durangaldeko sortzaileen ekoizpen artistikoa sustatzea eta proiektuaren iraunkortasuna bermatzea. Eredu hori benetako parte-hartze prozesu baten bidez definitu beharko litzateke, eragile nagusien inplikazioarekin; hala ere, tristuraz ikusten dugu EH Bilduren eta Herriaren Eskubideak-Podemosen gobernu taldeak berriz ere alde bakarrez erabakitzen duela, eta noski, gainerako durangarren ekarpenak edo parte-hartzea kontuan hartu gabe”.

Durangoko EAJ-PNVk azaldu du ados dagoela espazio hau “lehenbailehen irekitzeko aukerarekin, baina ez dakigu kudeaketa-eredu horrek zer ekarriko dion Durangori eta Udalaren beraren kultura-jarduerari. Gure ustez, arretaz hausnartu beharreko gaia da, erabaki egokienak hartzeko informazio eta alternatiba guztiak aztertuz, behar bezalako gardentasunez egiteaz gain”. Horretarako, espediente osoa eskatuko dute langileei, udalerako aurreikusitako gastuei eta abarri buruzko xehetasunak ezagutzeko.