Durangoko EAJ PNV Udal Taldeak 'Durango Sariak' sarietan sarituak izan direnen aintzatespena txalotu eta babesten du. Sari horiekin bat dator funtsean, izan ere, Juan Jose Ziarrusta alkate jeltzaleak bultzatutako 'Durango Uria' saria izan zen sari hauen aitzindaria. “Hala ere, beste behin ere penatu egiten gaituzte moduek, parte-hartzeaz hitz egiten duen gobernu talde honek ahaztu egiten baitu oposizioko alderdiak, herritarren ordezkari legitimoak, partaide bihurtzea. EH Bilduko eta Herriaren Eskubideak-Podemoseko ordezkariek bakarrik banatuko dituzte sariak”, Mireia Elkoroiribe bozeramaile jeltzaleak salatu duenez.

2003an sortu ziren 'Durango Uria' sariak, eta lau edizio izan zituen guztira. Oraingo honetan bezala, helburua arlo guztietako kultur eta kirol arloko elkarte eta erreferenteak saritzea zen beraien lana aintzatetsiz. Sarituetako bat, 2004ko ‘Durango Uria’, hain zuzen ere, Leopoldo Zugaza zendu berriarentzat izan zen. Merezitako saria izan zen, eta beti gogoratuko dugu euskal kulturari eta Durangokoari egindako ekarpenagatik.

Orduko hartan, ekimena osoko bilkuran eztabaidatu zen, eta zenbait alderdik parte hartu nahi izan ez bazuten ere, oposizioko talde guztiak gonbidatu zituzten “gobernu talde horrekin kontrakoa gertatzen da, eta ez da eztabaidatzen, ezta ezein talderi parte hartzen uzten ere. Horrek agerian uzten du, berriz ere, gobernuan dauden alderdien jarrera” azaldu du bozeramaile jeltzaleak. “Hala ere, gure aintzatespena eta eskerrak eman nahi dizkiegu egindako lanagatik eta durangarren bizitzari egindako ekarpenagatik saritutako pertsona eta elkarte guztiei” azpimarratu du Mireia Elkoroiribek.
Zorionak, beraz, Eneko Sagardoy, Miguel Zugaza, Asier Aguirre, Elisabeth Luengo, Jon Sarobe, Juanjo Moreno, Karrika Antzerki Taldea eta Tabirako Saskibaloi Taldeari.

‘Durango Uria' sarien edizioetan sarituak honako hauek izan ziren:

• Euskararen zabalkundeari/euskara sariari saria:

2003 Igor Elortza (Bertsolaria).

2004 Jose Luis Lizundia (Euskaltzaina)

2005 Unai Iturriaga (Bertsolaria)

2006 Kurutziaga Ikastola

• Gizarte-lanaren/gizarte-sariaren saria:

2003 Herria Auzo Elkartea.

2004 J.A.E.D.

2005 Durangoko Mugarra Odol Emaileen Elkartea.

2006 Karitateko Jesusen Zerbitzarien Institutua

• Kultur lanaren saria (Kultura Saria):

2003 Gerediaga Elkartea.

2004 Durangoko orfeoia.

2005 Jesús Egiguren (konpositorea)

2006 Durangoko Musika Banda

•  Kirol lanaren saria (Kirola Saria)

2003 Alpino Tabira Kluba.

2004 José Alcíbar eta José Lores.

2005 Durangoko Kirol Kultur Elkartea

2006 José Luis Romero Mínguez

• Aukera Berdintasuna/Berdintasun Saria:

2003 Gurutze Arregi.

2004 Durangoko Emakumearen Sustapenerako Zentroa.

2005 Joane Somarriba

2006 Tabirako kirol taldea

• Sari Berezia:

2003 Miguel Zugaza.

2004 San José Maristak-Ikastetxea.

2005 Luis Angel Sarobe (Pianista)

2006 Joaquin Rueda

• Durango Uria saria:

2003 Karmel Onandia (enpresaria).

2004 Leopoldo Zugaza (Kultura).

2005 San Jose-Jesuitak Ikastetxea (125 urte hirian).

2006 Azterlan teknologia zentroa